1. ’n Lieflike grasperk

Lei altyd jou grasperk soggens nat (voor 08:00 is ideaal) en dien gereeld 3-1-5-kunsmis toe om dit dwarsdeur die somer te laat gedy.

2. Blomgroei

Sny of snoei jou blomdraende struike een keer per maand om baldadige blomme in die somertyd te verseker.

3. Inheemse indoenas

’n Mengsel van inheemse en blomplante bied jou ’n waterwys tuin en verseker ook dat jy dwarsdeur die jaar blomme sal hê.

4. Sing jy van blomme  …

Plante wat oorvloedig blom, is ’n plesier as jy van snyblomme in jou huis hou. Inkalelies groei soos weghol-brande – trek dit eerder uit die grond as wat jy dit pluk wanneer jy die blomme oes, want dit moedig groei aan.

5. Kostyd

Verleng die blomtyd van jou plante met blaarvoeding (’n vloeibare kunsmis word direk op die plant se blare gespuit) van ’n produk soos Seagro Seaweed Foliar Spray en vul yl plekkies grondlangs met ’n deklaag of ’n grondbedekker aan. Bounce Back of ’n soortgelyke groeiproduk wat een keer per maand gebruik word, sal ook blomplante aanmoedig om aan te hou blomme dra.

6. Woeker op jou werf

Gemengde gebruik van blomme-, groente- en kruietuine verskaf heel- wat visuele plesier en eetbare belonings. Spaar kosbare plek en gebruik lat- of traliewerk waarteen plante soos pronkertjies (op die foto), tamaties, boontjies, komkommers en lemoen-pampoentjies kan oprank.

7. Groen plaagbeheer

Verjaag slakke met skyfies komkommer wat in ’n aluminiumhouer geplaas word – die komkommer reageer met die aluminium en gee ’n reuk af wat slakke en hul maters pes (maar wat ons nie kan ruik nie)!

8. Roos-raad

Rose wat voldoende water kry, is meer geneig om siektes te weerstaan. Skep ’n dammetjie om elke boom om die water op te vang – en gee dit elke tweede dag water in plaas van elke dag.

9. Sonde met die ‘diere’

Honde-urine bevat hoë vlakke van stikstof wat grasperke kan doodmaak. Verbeter dié kolle so: verdun jou hond se gunsteling-draailoopkolle met water, en om te verhoed dat hy weer na dieselfde kol toe teruggaan, bedek die area met ’n tak of twee van ’n doringboom totdat die gras herstel het.

10. Sit die pot … raak

Plaas potte met geharde vetplante in op jou terras vir heeljaar se genot. Groepeer potte van verskillende vorms en groottes en gebruik vetplante as die samebindende faktor.

Bron: Goeie Huishouding-tydskrif 

The post 10 wenke vir ’n welige tuin appeared first on Goeie Huishouding.

’n Tuindam is ’n lieflike fokuspunt, omdat dit ’n kalmerende agtergrond bied wat relatief min onderhoud verg, waarde toevoeg en as ’n mini-ekostelsel funksioneer wat voëls, skoenlappers, naaldekokers en paddas lok. Dís wat jy moet weet:

GROOTTE

Tuindamme kan groot of klein, formeel of so natuurlik voorkom dat dit netsowel maar altyd daar kon gewees het. Besluit waarvan jy hou en wat in jou tuin sal pas. Selfs ’n groot pot of ’n on- verwagse element soos ’n outydse bad met kloupote sal werk. Die meeste pro- fessionele installeermaatskappye bied veselglasontwerpe wat vooraf vervaardig is, of ’n buigbare plastiekvoering, wat dit natuurliker laat lyk. Rond dit af met ’n bedding van plante en klippe.

WENK Verseëlde sement, keramiek, porselein of ’n houtvat wat met dik plastiek uitgevoer is, maak wonderlike onkonvensionele damme – solank die houer ontwerp is om water te hou en die materiaal nie giftig is nie. Wanneer dit met waterplante en goudvisse gevul is, is die onderhoud min: jy moet net keer dat muskiete nie daar uitbroei nie (’n fonteintjie of pomp behoort daarvoor te help, want dit laat die water aanhou beweeg, en muskiete verkies stilstaande water). Jy moet ook toesien dat die alge nie oorneem nie en jy moet die dam gereeld met vars water aanvul.

LIGGING

’n Volle dag se intense sonlig sal die groei van alge aanmoedig, die blootgestelde gedeeltes van waterplante brand en kan skadelik vir die inwoners sowel as paddas en visse wees. Half-skadu, of net oggend- of middagson, is die beste opsie.

TOERUSTING EN ONDERHOUD

’n Pomp, filtreerstelsel en elektriese kostes sal sommige van die aanvanklike uitgawes wees. Daarna lê ’n wêreld van keuses voor jou oop: nét plante, plante en goudvisse of koivisse, ’n net waarmee visopdrifsels afgeskep kan word, dekoratiewe stene of plaveisel, ’n stroompie of watervalle … Visse wat vir dekoratiewe doeleindes aangeskaf word is gehard, maar vereis daaglikse voeding. Jy sal toerusting nodig hê om die water se chemiese balans te toets en produkte om die water skoon en die visse gesond te hou. Daar is bemesting vir waterplante beskikbaar, maar dit kan die visse benadeel, daarom is ’n organiese opsie beter.

WENK Terwyl dit die beste is om ’n spesialiteitswinkel te besoek, bied www.superpumps.co.za heelwat pro- dukte, alles-in-een-toerusting ingesluit, asook goeie (en gratis) raad.

WATERPLANTE 101

’n Balans tussen drywende plante (om te verhoed dat alge versprei en om vis teen sonlig te beskerm) en suurstofhoudende grasse is noodsaaklik. Tensy jy ’n natuurlike gronddam het waarin die plante hul wortels kan anker, (en met die uitsonde- ring van drywende plante) moet plante in potte gehou word. Waterlelies is ikoniese damplante en daar is verskeie spesies beskikbaar. Dit vereis ’n dieper watervlak (sowat 30 cm bokant die wortels) en voldoende spasie, want die blare versprei.

IN PAS MET DIE NATUUR

Natuurlike swempoele bied ’n wonderlike alternatief vir tradisionele swembaddens. Hoewel mensgemaak, is dit feitlik soort- gelyk aan natuurlike poele vanweë die ontwerp en hoe dit in die landskap geïn- tegreer word. ’n Biofiltreerstelsel van waterplante en minerale verskaf helder, gesuiwerde water sonder enige chemi- kalieë. ’n Filter vang opdrifsels vas, terwyl ’n pomp die water sirkuleer en van suur- stof voorsien. Dis heerlik om in ’n natuur- like swempoel te swem, dit verg min on- derhoud, hou baie gesondheidsvoordele in en sal in ’n lewende ekostelsel ontwikkel waarby die natuurlewe én die omgewing sal baatvind.

The post Moet-weet: Tuindamme appeared first on Goeie Huishouding.

Om met ’n kruietuin op jou vensterbank te begin is ongelooflik bevredigend. Jy’t altyd aromatiese geure romdom jou met net die insetkoste aan die begin. Boonop het jy die gemoedsrus dat jy jou deel vir die omgewing doen deur verpakking, plaagdoders en die vervoerketting uit te skakel – én jy verfraai jou eie ruimte. Kom grawe ’n bietjie dieper oor wat jy moet doen.

STAP 1: KIES DIE REGTE PLEK

Voordat jy in potte, saailinge en grond belê, moet jy seker maak jou vensterbank kry genoeg son (minstens ses uur per dag) om die plante gelukkig te hou.

STAP 2: POTKEUSE EN VOORBEREIDING

Kies terracotta bo metaal (wat baie warm word) of plastiek (chemikalieë sypel mettertyd in die grond in). Die grootte van die potte wat jy kies, sal afhang van die grootte van jou vensterbank, maar alle plante hou van groeiruimte. Die meeste kruie is nie kieskeurig oor die grond waarin hulle groei nie; ’n mengsel van organiese grond en kompos van die kwekery sal hulle tevrede hou (twee dele grond en een deel kompos). Hoewel kruie minder onderhoud as huisplante vereis, is hul sukses van goeie dreinering afhanklik. Spit ’n bietjie gruis in jou grond in en bedek die onderste deel van jou pot met erdewaresplinters of klippies wat jy by die kwekery koop.

STAP 3: KIES JOU KRUIE

Tuinsentrums is propvol versoekings. As jy nie die ongewone variëteite gereeld gaan gebruik nie, sal jou impulsiewe kopies bloot ornamenteel wees. Die ideale vensterbanktuin behoort roosmaryn, platblaarpietersielie, ment, basiliekruid, origanum en tiemie in te sluit, met salie, uiegras en koljander kort op hul hakke.

STAP 4: NATLEI, OES EN ONDERHOUD

Hoewel sommige kruie gedeeltelike klam grond vereis, bly die meeste graag droogvoets. Die algemene waterwysheid hier is: Minder is meer: Gee elke tweede dag of so water as jou kruie in ’n sonnige hoekie is, maar kyk eers of die grond droog lyk voordat jy dit water gee. Wanneer jy kruie pluk, breek of sny die kleiner stukkies aan die bokant af om groei aan te moedig, Blomvorming verhinder groei; verwyder dus die blomme. Bederf jou kruie met ’n weeklikse aanvulling. Vra by jou kwekery vir ’n middel wat nie ’n te sterk reuk het nie en veilig is vir gebruik met eetbare plante.

5 KRUIE OM TE PROBEER

SUURLEMOENTIEMIE

Uitstekend saam met hoender- en visgeregte.

DONKER OPAALKLEURIGE BASILIEKRUID

Dié pers krui se geur skrik vlieë af.

FRANSE DRAGON

Gebruik dit (spaarsamig) saam met vis en vleis, maak dragonbotter, geur romerige souse daarmee en voeg dit by asyn vir  dragonasyn. Voeg dit teen die einde van die kosmaakproses by, want hitte vernietig die geur.

APPELMENT

Vir ’n vrugtige skop, voeg dit by warm water, kap dit in vrugteslaai of gebruik dit in vleisvulsels.

MARJOLEIN

Vervang origanum deur vars marjolein of gebruik dit om olies te geur.

GOED OM TE WEET

• Ken jou jaarplante en jou meerjariges. Die meeste van die houtagtige Mediterreense variëteite regenereer seisoenaal op hul eie. Basiliekruid en koljander sal egter nie die winter oorleef nie en moet in die lente vervang word.
• As die plante in jou gevestigde tuin gelukkig lyk, is dit ’n teken dat jy goeie grond het. Dit beteken die meeste kruie in potte behoort te oorleef as jy dit buite wil plant. Kies ’n sonnige plek moet goeie dreinering (asook min wind vir sensitiewe plante soos basiliekruid).
• Moenie bekommerd wees as jou vensterbanktuin aan die einde van die winter ’n bietjie troosteloos lyk nie. Selfs al het jy die hele winter lank baie lig sal die meeste kruie in dié tyd stadiger groei of selfs heeltemal ophou groei. Pluk minder kruie totdat jou plante weer hul lenteveerkrag teruggekry het.

The post Kweek ’n kruietuin op jou vensterbank appeared first on Goeie Huishouding.

1. Verryk jou grond se voedingswaarde en verbeter die waterretensie deur organiese óf chemiese metodes.

2. Kompos bevat redelik baie voedingstowwe, maar die belangrikste funksie is om die grondgehalte te verbeter. Dit behoort saam met kunsmis gebruik te word.

3. Kies waar moontlik organiese bemestingstowwe, want dit verseker die langtermyn-volhoubaarheid van die grond. Dit word van plant- en diereafval vervaardig.

4. Bemesting is in drie formate beskikbaar: droog, as ’n vloeistof en as stadig-vrystellende korrels.

5. Op die verpakking van die meeste chemiese bemestingstowwe staan die letters NPK geskryf. Dit dui op die verskillende verhoudings waarin al die bemestingstowwe aanwesig is – stikstof (N), fosfor (P) en kalium (K). Stikstof moedig blaargroei aan, fosfor verrig wondere met wortelgroei en kalium is soos ’n vitamieninspuiting vir blomme, vrugte en groente.

6. Die verhouding waarin dit aangetref word, verskil afhangende van waarvoor die bemesting gebruik word. Voedingstowwe vir grasperke, slaai, tamaties, rose en orgideë het almal verskillende voedingsvereistes.

7. Plante het as bykomende aanvulling ook klein hoeveelhede spoorelemente soos koper, magnesium, kalsium, sink en yster nodig, wat in die meeste bemestingstowwe wat kommersieel beskikbaar is, aangetref word.

8. Maak seker jy koop die regte soort kunsmis deur die besonderhede op die verpakking noukeurig na te gaan.

9. Uitsonderings op dié reëls is sommige Mediterreense kruie en Kaapse bolle wat beter vaar in grond wat arm is aan voedingstowwe. Dis egter altyd ’n goeie idee om kompos by te voeg.

ONS TOPKEUSES

Kyk by jou plaaslike kwekery vir dié handelsmerke en produkte:

• Multicote Controlled Release Fertilizer is nuttig vir potplante.

• Neutrog Seamungus Organic Pellets is ’n heilsame aanvulling vir plante.

• Multifeed, Seagro en Nitrosol is alles goeie vloeibare bemestingstowwe.

• Trelmix is ’n oplossing van spoorelemente wat plante behandel wat kwyn en sukkel met blare wat vergeel.

• Biogrow-kunsmis is organies.

• Talborne Organics bied ’n uitstekende reeks natuurlike bemestingstowwe en daar’s ook ’n nuttige webwerf, www.talborne.co.za om te raadpleeg.

The post 9 maniere om jou tuin in ’n lushof te omskep appeared first on Goeie Huishouding.

Beplan en plant om so ’n groot verskeidenheid van voëls en insekte as moontlik te lok, en jy sal die plesier beleef van ’n tuin wat waarlik zoem van die lewe – en ’n wonderlike plek vir jou kinders om meer omtrent die natuur te leer. Jy sal ook jou deeltjie tot bewaring bydra, aangesien elke stadstuin ’n hawe vir voëls en insekte is.

1. Vir voëls

Suid-Afrika het byna 900 stand- en trekvoëlspesies, waarvan minstens 100 algemene tuinbesoekers is. Met die regte plante kan jy enigiets van tien tot 50 verskillende voëls hê wat jou tuin besoek. Belê in ’n voëlgids en begin om rekord te hou van besoekers. Hugh Chittenden se Roberts Birds Guide (Jacana Media) en die Sasol First Field Guide to Common Birds deur Tracey Hawthorne (Random House Struik) is goeie keuses.

• Plant struike en bome met nektarryke blomme, en bessies en grasse vir nesmateriaal en saad.

• Verskaf ’n sanderige strook vir stofbaddens.

• Stel ’n voëlbad of -voerder op.

• Oranje en rooi blomme soos aalwyne, Kaapse kamferfoelie en rooiwarm vuurpyle sal suikerbekkies nader lok.

2. Vir bye

Daar is meer as 1 000 soorte bye wat hulle in jou tuin kan tuismaak.

• Plant eenvoudige lekkerruikblomme met oop kerne soos madeliefies, of met wye tuite soos vingerhoedjies, wat maklik toeganklike nektar en stuifmeel het. Dubbele blomme met massas blomblare maak dit moeilik om by die nektar uit te kom.

• Pers, blou, geel en wit is die kleure wat bye die aantreklikste vind.

3. Vir skoenlappers

Kry Simon van Noort se Sasol First Field Guide to Butterflies and Moths of Southern Africa (Random House Struik) en begin meer as 650 skoenlapperspesies identifiseer. • Plant nektarryke plante in sonnige dele van jou tuin.

• Hou ’n sandstrook oop waar reën kan versamel om modderpoeding te maak, wat die manier is waarop skoenlappers sekere belangrike voedingstowwe opneem.

• Stadig met die uitroei van onkruid: Melkbossie, brandnetels en kiesieblaar is belangrike gasheerplante vir skoenlapperlarwes.

The post Lok voëls, bye en skoenlappers na jou tuin appeared first on Goeie Huishouding.

• Gebruik karwaks om onwillige gereedskap soos ’n tuinskêre te olie.

• Plant ’n saailing in ’n suurlemoenskil.

• Gee gebreekte potte nuwe lewe deur die skerwe as plantmerkers te gebruik.

• Gebruik ’n stortrakkie om ’n hangtuin te maak.

• Kry jy nie ’n gieter wat giet soos jy wil hê dit moet nie? Maak een uit ’n ou plastiekmelkbottel.

Bron: Buzzfeed.com

The post 5 wonderlike tuinwenke wat jy gerus kan probeer appeared first on Goeie Huishouding.

’N BESEM

Nes ’n ordentlike jenewer en tonikum moet jou besem sterk genoeg wees vir opveetakies in die tuin en oprit, op die stoep of balkon.

’N TUINVURK

Dis noodsaaklik om groter plante mee uit te spit of onkruid te verwyder. Kies uit die verskeidenheid van smaller, ligter randvurke tot by die bielies vir swaarder spitwerk.

HANDSKOENE

Kaal hande is die beste, maar gebruik handskoene as jy beskerming nodig het teen plante met dorings of die soorte wat velirritasies kan veroorsaak.

HANDSKOFFEL

Dié dubbeldoelige item met die plat skoffel aan die een kant en getande rande aan die ander kant kan gebruik word om onkruid uit te skoffel, gate vir nuwe plantjies te grawe en die grondoppervlak gelyk te skraap.

HANDSNOEISKÊR

Dis onontbeerlik om blomme mee af te sny, houtagtige kruie gelukkig te hou en daardie klein, harde takkies mee by te kom. Die gewildste soorte is die veeldoelige snoeiskêre met geronde lemme wat amper soos ’n papegaai se snawel lyk. Kies een met ’n veiligheidsmeganisme wat die handvatsels toe hou as dit nie gebruik word nie.

HANDTROFFEL

Hierdie is een van die nuttigste stukke tuingereedskap vir takies soos die spit van kleiner gate, die meng van kompos en kunsmis en die verplanting van plante. ’n Gepunte troffel is geskik om gate te grawe; een met ’n geronde punt maak dit kinderspeletjies om grond mee te skep.

TUINSLANG

’n Basiese tuinslang van goeie gehalte sal in ’n kleiner area deug. Al die bekende handelsmerke bied ’n veeldoelige snelleraksie-sproeispuit wat vir ’n verskeidenheid maniere van waterspuit voorsiening maak – van ’n ligte stuifsel water tot ’n sterk stroom. Koop ’n losstaande spoel om dit aan op te rol, of een wat aan ’n muur gemonteer word om jou tuinslang te bêre.

’N HARK

’n Eenvoudige plastiekhark is nuttig om blare en gras op te vee en jou gruispaadjies netjies te hou.

’N SNOEISKÊR MET ’N LANG HANDVATSEL

Jy sal een hiervan nodig hê as jy bome of struike met dik takke wat gereelde onderhoud verg in jou tuin het. Dié stuk gereedskap werk ook soos ’n hefboom.

’N SKAAPSKÊR

Gebruik dit om laventel en ander houtagtige struike netjies te hou. Dis ook noodsaaklik om heinings te snoei en ongewenste stukkies gras by te kom.

’N KLEIN ONKRUIDVURK

Dis handig om onkruid uit blom- en groentebeddings los te torring en vir rondkrap in jou tuinpotte. Dit help ook om die grond te laat asemhaal.

’N GRAAF

’n Algemene ligte graaf is net die ding om gate te grawe vir struike en jong boompies, of om die grond los te maak voor jy iets plant.

GIETERS

Kyk uit vir een met ’n lang nek en ’n tuitgedeelte wat ’n ligte sproeisel water deurlaat. Gebruik dit om saadbakkies, saailinge en gevestigde maar delikate plantjies mee nat te lei. ’n Gieter met ’n smal tuit sal vir jou huisplante deug.

WELLINGTON-STEWELS

Dié vrolike bykomstighede is onontbeerlik as jy groot spit- en grawewerk wil aanpak.

The post Grawe, vurke en ander goeters appeared first on Goeie Huishouding.

Dié lig het twee hoogteverstellings en ’n skerp punt sodat jy dit maklik in die grond kan druk. Ons toetsers het opgemerk dat dié lig telkens ’n rukkie ná die ander aangegaan en heelwat vroeër afgegaan het, selfs al was dit nog donker. Dis redelik lig, maar die dik monteerpaal en skerp punt maak dat dit nogal stewig staan. Die lig skyn nie baie helder nie.

The post Sonkrag-tuinlig appeared first on Goeie Huishouding.

1. Ken jou skadu – Is dit vol- of halfskadu, droog of klam? Die grond onder bome kry dikwels min reën en kan daarom redelik droog wees. In gebiede met ’n hoë reënval kan die grond onder bome weer klam wees. Daar is egter plante wat by albei omgewings kan aanpas. Volskadu weens mure of geboue beperk jou keuse van plante. Die meeste skaduplante groei in die natuur op die woudvloer, teen rotswande of teen steil hellings. Dit beteken hulle sal gefiltreerde of net enkele ure sonlig per dag kry. Van hulle sal in volskadu groei, maar dan sal hulle nie so geredelik blom nie.

2. Bewerk jou grond – As daar hope blare onder bome lê, moet dit nie verwyder nie. Dit beskerm die grond en sal uiteindelik afbreek en kompos word. Maak die grond net 
los en strooi ’n stewige laag kompos en organiese bemesting soos Bounce Back (www.neutrog.co.za) voordat jy plant. Bemesting met gips soos Soil Build (www.naturalgardeningprinciples.co.za) sal die tekstuur van swaar kleigrond en sanderige grond verbeter.

3. Ken jou plante

Struike wat van nature in ’n woud se onderbos of op die woudrand groei, sal aantreklike lae en afgeslote plekkies skep. Krismisrose, japonika, oranje jasmyn (Murraya exotica) en Indiese meidoring (Raphiolepis indica) is enkele van die gewilde blomstruike wat jy veral in klam skadu kan plant.

Grondbedekkers verskaf tekstuur, beskerm die grond en skep ’n lowergroen tapyt. Blou senegroen (Ajuga reptans), hen-en-kuikens (Chlorophytum comosum), mondogras en rankende vingerhoedjie (Asystasia gangetica) is geharde gunstelinge.

Bolplante gee in blomtyd loof en kleur. Boslelies, aronskelke, agapante en wilde irisse (Dietes-sp.) sal met hul blomme kleur verskaf.

Aksentplante soos boomvarings
en drakebloedbome (Dracaena-sp.) en plante met groot blare soos akant, olifantsoor en kraanvoëlblom (Strelitzia-sp.) verskaf vorm en atmosfeer.

* Plant varings, vingerhoedjies en akelei om die gevoel van ’n feetjietuin te skep. Dit kan van saad of saailinge gekweek word.

The post Maak tuin in die skadu appeared first on Goeie Huishouding.

1. Moenie té veel …

… voeding toedien nie en volg altyd die aanwysings vir die regte hoeveelheid en hoe dikwels dit herhaal moet word. Té veel doen meer skade as té min.

2. Korrels wat stadig vrygestel word …

… spaar baie tyd, veral by potplante.

3. Vloeibare aanvullings …

… werk maklik en doeltreffend omdat jy dit kan toedien terwyl jy die plante natlei of jy kan dit ook op die blare spuit vir vinnige absorpsie.

4. Verander af en toe …

… die manier waarop jy voeding toedien. Skakel byvoorbeeld van korrels oor na vloeibare voeding en omgekeerd.

5. Wurmtee …

… is ’n fantastiese organiese vloeibare voedingstof – dis dalk die moeite werd om in ’n wurmteelplasie te belê!

Wanneer moet jy kos gee?

• Die begin van die groeiseisoen (lente of herfs) is ’n goeie tyd vir die toediening van voedingstowwe. Staak dit wanneer plante in ’n rusfase ingaan. (Dit geld
veral bolle en potplante, maar alle plante het rus nodig.)
• Ná swaar reën, wat geneig is om voedingstowwe uit die grond te spoel, is ekstra voeding nodig.
• Dien voedingstowwe toe nadat plante gesnoei is.

The post 5 planne vir ’n weliger tuin appeared first on Goeie Huishouding.

Die winter en vroeglente is die ideale tyd om jou tuingereedskap reg te kry vir die seisoen wat voorlê. Hier is onderhoudwenke om gereeld toe te pas om jou gereedskap langer te laat hou en net so goed soos jou tuin te laat lyk

Pas dit op

Vurke, grawe en handgereedskap met vlekvryestaalhandvatsels sal dekades hou as jy dit goed oppas. Maak lemme een keer ’n maand skerp, gee vere olie en vervang beskadigde dele.

Vir gerief

Koop handgereedskap met hout- of rubberhandvatsels, want dit is gemakliker om vas te hou.

Hou dit netjies

Moenie tuingereedskap aan die elemente oorlaat nie. Maak die lemme van grawe en skêre ná gebruik skoon en vee dit met ’n olierige lap af voordat jy dit bêre.

Hou gereedskap steriel

As jy gereedskap soos snoeiskêre vir plante met siektes gebruik het, steriliseer dit deeglik deur dit af te vee met ’n lap wat in verdunde bleikmiddel of alkohol geweek is. Vee dit goed af om enige spore van siektes te verwyder.

The post 4 noodsaaklike wenke vir jou tuingereedskap appeared first on Goeie Huishouding.

’n Sonnige hoekie in jou tuin of ’n planthouer op ’n balkon wat baie lig kry, is die perfekte plek om geurige, heilsame kruie te kweek.

Waar om te plant

Kruie het baie son nodig – minstens vier uur regstreekse sonlig per dag. Plant dit naby jou kombuisdeur sodat jy dit vinnig kan pluk terwyl jy kosmaak.

Voorbereiding

Goed gedreineerde grond is noodsaaklik.Werk heelwat organiese stof en kompos in die grond in. Maak seker die houers het dreineringsgate en bedek dan die bodem met ’n laag klippe, stukkies baksteen of dreineringsgruis voordat jy ’n mengsel van kompos en grond byvoeg. Ou sponse kan ook werk – dit behou water goed.

Wanneer om te plant

Augustus is ’n goeie tyd om pietersielie- en grasuiesaad te plant. As jy in ’n

kouer gebied woon, wag tot September wanneer die ergste ryp verby is. Of plant dit in saadbakkies en plant die

saailinge later uit. Meerjarige kruie soos roosmaryn, origanum en tiemie kan heeljaar as jong plante geplant word.

Onderhoud

Gee gereeld water, maar laat die boonste 2 cm grond tussen sessies droog word, want kruie hou nie van nat wortels nie. In warm weer sal jy dit daagliks moet natmaak en in kouer weer een of twee keer per week. Voed dit een keer per maand met ’n organiese vloeibare kunsmis of twee keer as dit in houers is. Te veel kunsmis sal kruie sag en hul stingels baie lank maak. Verdun dit dus tot die helfte van die aanbevole sterkte.

Tien kruie om te plant

Jaarplante

Dié kruie gaan dood nadat dit geblom het. Pluk die blomkoppe af om blaargroei te bevorder. Plant nuwe saad of saailinge in die lente.

1. Pietersielie Garnering wat ’n multivitamienén ’n mineraalaanvulling is!
2. Basilie Plant verskeie variëteite vir tamatiegeregte in die somer.
3. Koljander is geneig om vinnig saad te skiet. Plant dus maandeliks nuwe saad sodat jy van hope geurige blareverseker is. Oes die saad wanneer dit ryp is en gebruik dit as speserye.

Meerjarige plante

Dié kruie groei jaar ná jaar. Voed dit aan die begin van die lente met kompos om groei te stimuleer. Plant dit as saailinge

en jong plante vir ’n kits-kruievoorraad.

4. Kruisement is geneig om oor te neem. Plant dit dus in ’n aparte houer.
5. Grasuie groei maklik van saad, sterf in die winter af en skiet weer in die lente uit.
6. Suurlemoentiemie Dié smullekker en medisinale krui is maklik om te kweek.
7. Origanum Dis baie geuriger vars as wanneer dit gedroog is.
8. Salie groei maklik van saad. Dit is dus die moeite werd om die plant elke paar

jaar te vervang as dit yl groei.

9. Roosmaryn is droogtebestand en maklik om te kweek.
10. Lourier kan so groot soos ’n boom groei. Gebruik die blare in roostergeregte, bredies en kerrie.

The post Plant kruie vir die lente appeared first on Goeie Huishouding.

Vir meer raad oor hoe om jou eie vertikale tuin te skep, besoek: Hoe om ’n vertikale tuin te skep 

The post Suzelle DIY: Hoe om ’n vertikale tuin te skep appeared first on Goeie Huishouding.

Deur Leah van Deventer

The post Metgeselplante appeared first on Goeie Huishouding.

Hulle grawe jou kosbare petunias uit, hardloop ’n pad deur jou gunsteling-blombedding of begrawe ’n been in die middel van die grasperk. Dis g’n wonder ons geliefde hondekinders is nie altyd ’n ywerige tuinier se beste vriende nie. Met ’n bietjie beplanning kan ’n tuin egter só uitgelê word dat troeteldiere en plante saam daarin kan floreer.

PATROLLIEPAADJIES

Honde patrolleer graag die buitewyke van ’n tuin en verjaag indringers soos eekhorings en voëls. Bestudeer jou hond se gunstelingroetes en lê dan interessante paadjies al langs die buiterande van jou tuin uit. Dit sal dit vir hulle makliker maak om oefening in te kry en hul rondtes te doen sonder om jou blombeddings te vertrap.

’N OOP RUIMTE

’n Oop ruimte vir speelplek is noodsaaklik. Hoewel ’n netjiese grasperk voldoende is, wees gerus ’n bietjie kreatief en skep ’n miniweiveld met wildegras. Dit bied meer geleenthede vir honde en katte om te verken en te speel. As hulle kan skoenlappers jaag en wegkruipertjie speel, sal hulle nie sommer gate grawe of uit verveeldheid verwoesting saai nie. ’n Weiveld bied ook lang grashalms waaraan troeteldiere kan kou, wat sal keer dat hulle jou blomme opvreet.

AFSPERRINGS

Sper blombeddings met ’n stewige buksboomheining af of plant ’n geharde grondbedekker soos ranktiemie as ’n buffer. Gebruik stukke dryfhout of rivierklippe om ’n duidelike grens tussen die speelplek en jou blombeddings te skep en om te keer dat delikater plante in die slag bly.

UITSPANPLEK

Honde is geneig om ná ’n uitputtende speelsessie op die koelste plek moontlik neer te plons, en dis dikwels in die middel van ’n skaduryke blombedding. Rig vir hulle ’n koel lêplek onder ’n boom of op die stoep in met ’n groot waterbak en ’n gemaklike hondebed. Dit sal jou bedding na ’n minder aanloklike uitspanplek laat lyk.

VertiKALE TUINE

As jy ’n klein tuin het of ’n hond wat van grou hou, oorweeg van die tegnieke van vertikale tuine (besoek http://www.goodhousekeeping.co.za/af/home-organising/how-to-create-a-vertical-garden/) om jou kruie, groente en blomme buite troeteldiere se bereik te hou en meer beweegruimte vir hulle te laat.

GRAWEPLEK

Om gate te grawe is ongelukkig in party honde se gene. As jou hond dit nie kan afleer nie, skep ’n hondvriendelike sandput in ’n skaduryke hoekie waar hy na hartelus kan delf. Honde sal dit veral op warm dae geniet wanneer baie van hulle verkies om ’n middagslapie in ’n holte in die koel grond te vat.

The post Maak jou tuin hondvriendelik appeared first on Goeie Huishouding.

Februarie is ’n goeie maand om in jou tuin besig te raak. Daar is soveel wat jy kan doen om die meeste uit jou tuin te kry in die laaste warm dae van die somer.

1. Maak dit jou maand om waterwys te wees. Begin deur jou dekke en plaveisel buite met ’n besem skoon te maak, nie ’n tuinslang nie.
2. Bedek jou blombeddings dié maand met ’n goeie laag kompos (ook bekend as swart goud) of houtsnippers.
3. Probeer dié selfdoen-tuintruuk: Druk ’n roosstiggie in ’n aartappel en plant dit in die grond.
4. Hou ’n emmer in die stort en gebruik die water om jou potplante in die huis en op die stoep nat te maak.
5. Begin om groentevariëteite te saai wat koel weer kan weerstaan, soos broccoli, blomkool en brusselse spruitjies, en bêre die saailinge op ’n koel plek.
6. Voed nou jou rose, jaarplante en meerjarige plante en sny dooie knoppe af. Dit sal voorgesette groei en blomvorming verseker.
7. Sny hierdie maand jou gras net elke twee weke pleks van elke week.
8. Snoei meerjarige blomstruike soos madeliefies en laventel sodat dit nog ’n keer voor die winter kan blom.
9. Eerder as om op Valentynsdag vir jou geliefde blomme te koop, kry ’n roosplant wat vir soveel langer vreugde sal verskaf.
10. Vries somerkruie nou sodat jy dit in die winter in soppe en bredies kan gebruik.

GOEIE GEREEDSKAP

Noodsaaklike gereedskap om jou tuin in ’n goeie toestand te hou

*Die pryse is eksklusief by Builder’s Warehouse

• Garden Master-driestuk-snoeistel, R260
• Garden Master NTS- kinkelvrye tuinslang, R395
• Garden Master- organiese kompos, R46
• Garden Master-produkte is by alle Game-, Builders Warehouse- en Makro-takke te koop.

Hierdie artikel is deur Garden Master geborg.

The post Hoe lyk jou tuin? appeared first on Goeie Huishouding.

Met die weer wat koeler raak, is dit jou maand om jou grasperk en die res van die tuin vir die opkomende wintermaande voor te berei.

1. Waterbeperkings is ’n werklikheid. Kyk uit na waterslim plante vir jou beddings. Oorweeg gryswateropsies en gebruik ’n emmer in die stort om water vir potplante op te vang.
2. Daar is nog tyd voordat die winterreën in die Kaap begin, en Gauteng maak reg vir die droë seisoen. Een woord: deklaag! Spaar water en voed die grond deur blombeddings ’n deklaag te gee.
3. Op soek na ’n maklike binnenshuise plant? Begonias is pragtig en so maklik om te laat groei.
4. As jy gereeld dooie blomkoppe van jou somerjaarplante afpluk en die plante met vloeibare kunsmis bemes, kan dit dalk nog weer voor die winter blom.
5. Dit is nou tyd om blombolle te koop wat in die winter en lente blom voordat dit uitverkoop word. Hou dit op ’n koel, donker plek totdat dit gereed is om in April geplant te word.
6. Berei jou beddings voor vir bolle met genoeg kompos, ’n goeie organiese veeldoelige kunsmis soos 2:3:2 (’n hand vol per vierkante meter) en ’n rojale hoeveelheid beenmeel.
7. Berei die gate vir nuwe vrugtebome en rose met mis, superfosfate en beenmeel voor.
8. Het jy geweet? Koeksoda is ’n vernuftige en veilige swamdoder. Meng 2 teelepels per 2 liter water en ½ teelepel skottelgoedwasseep. Spuit die mengsel op plante en groente wat met swamme besmet is.
9. Saai nou: Pronkertjies is ’n pragtige jaarplant wat goed groei en kan aan die einde van Maart geplant word – sit nou jou latwerk op en voed die grond met kalk ’n week voordat jy saai.
10. Grasperke wat voos is ná die somer, kan reggeruk word deur dit gereeld te hark, gate met ’n vurk daarin te maak om dit te belug en dit ’n deklaag vir die winter te gee.

NOODSAAKLIKE GEREEDSKAP

*Die pryse is eksklusief by Builder’s Warehouse

Garden Master Reguit heiningskêr & snoeiskêr R235

Garden Master Spitgraaf vir vroue R180

Garden Master Blue Ocean-tuinslang & -passtukke R190

Garden Master Staalhark R130

Garden Master-driestuk-snoeistel, R260

Garden Master NTS- kinkelvrye tuinslang, R395

Garden Master- organiese kompos, R46

Garden Master-produkte is by alle Game-, Builders Warehouse- en Makro-takke te koop.

Garden Master-produkte is by Builders Warehouse beskikbaar.

The post Hoe groei jou tuin dié herfs? appeared first on Goeie Huishouding.

Met die stygende koste van groente maak dit al hoe meer sin om jou eie te kweek as jy kan. Dit is nie net goed vir jou begroting nie, maar ook vir die siel!

Dié super-inspirerende “veggietorial” wys jou hoe om seldery, gemmer, knoffel, uie en meer te kweek uit die afval wat jy gewoonlik sou weggooi (of hopelik op die komposhoop). Boonop hoef jy nie ’n groot tuin te hê nie – jy kan die groente in ’n pot kweek. Kyk dit en jy sal twee keer dink voordat jy weer die kombuisafval weggooi.

The post Kweek ’n tuin uit kombuisafval appeared first on Goeie Huishouding.

Hoewel hulle skadeloos is, is dié insekte ’n pes. Hierdie klein, bruin miertjies word “suikermiere” genoem en word gelok deur soetgoed soos lekkers en suiker.

The post Hoe om van suikermiere ontslae te raak appeared first on Goeie Huishouding.

Dit is veral in Suid-Afrika belangrik om waterslim te wees. Hier is ’n paar goed wat jy kan doen:

1. Plant inheemse plante wat natuurlik in jou gebied voorkom. Uitheemse plante het dikwels meer water nodig.
2. Identifiseer mikroklimate in jou tuin en plaas plante waar hulle die beste sal pas.
3. Probeer plante met dieselfde waterbehoeftes bymekaar groepeer sodat jy nie te veel water aan plante gee wat dit nie nodig het nie, en omgekeerd.
4. Gebruik ’n deklaag om te keer dat vog ontsnap.
5. Bou windbrekers om te keer dat die wind grond uitdroog.
6. Vervang ’n grasperk deur ’n grondbedekker of plaveisel.
7. As jy jou grasperk behou, moet dit nie te kort sny nie omdat dit dan vinniger droog word.

WENK Vang reënwater in tenke op en gebruik grys water (uit baddens en wasbakke) om plante mee nat te maak.

The post 7 maklike wenke vir ’n waterslim tuin appeared first on Goeie Huishouding.